يحتفل العالم فى 19 نوفمبر من كل عام باليوم العالمي للرجل، وبينما يختلف مفهوم الرجولة من مجتمع لآخر ومن فئة لأخرى، سألنا الفتيات عن أكثر صفة تجعلهم يشعرون برجولة شريك الحياة.
شهم ويعتمد عليه
قالت آية: "الرجولة مواقف، مش كل من كان ذكر هو رجل، وأنا سبق واتخطبت ورغم كل مميزاته لكن حصل مواقف واحد ما حسيتش انه شهم وأقدر أعتمد عليه فحسيت إن كل مميزاته مش كفاية".
تتفق معها ياسمين: "أنا مرتبطة بأفضل رجل فى الدنيا، فيه كل الصفات اللي كنت بدور عليها، حنين طيب جدع رومانسي جدًا وفعلا يعتمد عليه وشخص مسئول" .
جدع ومش غدار
أما رحاب فقالت: "لو حقيقي لاقيت رجل بجد مش غدار حسسنني بحبه خلاص الموضوع انتهى، أنا لو نفسي ارتبط فهيكون معايير اختياري الأساسية إنه يكون جدع وكمان نفسي يكون شبه أبويا فى الطيبة والجدعنة والشهامة الصفات الحلوة كلها".
الحنية أهم
وقالت ريم: "نفسي في رجل يكون حنين الحنية أهم من أي شيء أخر لأن لو الشخص حنين فطبيعي هيكون سند يعتمد عليه وأي حاجة أخري سهلة تتعوض إلا الحنية الرجل الحنين رزق، الرجل الحنين حقيقي بيكون متربي كويس جدًا وبصراحة ممكن اتنازل عن أي حاجة ألا أنه يكون شخص حنون قلبه أبيض متسامح".
وأخيرًا تقول "ريهام": أنا أهم حاجة عندي النظافة الشخصية فالشخص النظيف المرتب مريح وغير مزعج ولكن الصفات الأخري مطلوبة "الحنية والحب والتعامل الطيب" لابد أن يكون من ضمن اختيار الشريك لأن أي بنت بالحياة تتمنى أن يدخل حياتها شخص رومانسي لطيف مرتب يمتلك ذوق رفيع في اختيار الألوان لديه القدرة على اختيار وقت الحديث أن يكون شخص مثقف لديه وعى بالحياة.
اليوم العالمي للرجال
اليوم العالمي للرجل
