عرض برنامج "من مصر" الذى يقدمه الإعلاميين عمرو خليل وريهام إبراهيم، عبر قناة CBC، قصة السيدة ناهد جمال سعيد، سائقة التروسيكل، والتي تحمل "الرمل والطوب والعفش" وهى أم لخمسة بنات، وعلى الفور، استجاب الرئيس عبد الفتاح السيسي، لحالة السيدة ناهد جمال سعيد، بعد مناشدتها بمساعدتها لتوفير عيشة كريمة لبناتها الخمسة.
وقال الرئيس السيسي في مداخلة هاتفية لبرنامج "من مصر": "أنا بأبلغ تحياتي واعتزازى وكمان ألمي الشديد إن يبقى فيه 5 بنات وهي بتجرى عليهم كده وإحنا بنتفرج".
ووجه الرئيس السيسي حديثه لسائقة التروسيكل، قائلا: "ربنا يديكي الصحة.. هندبر كل اللى عايزاه وهي تستحق كل خير .. كل ست بتعمل كده تاج على راسنا وتشرفنا.. والسيدة دي ست بـ100 راجل وبقول لكل مسئول في مصر من فضلكم خلوا بالكم من أهلكم وناسكم وخلوا بالكم من عرضكم.. الست عرض وإحنا مسئولين عنها في الظروف اللى زي كده".
وأردف الرئيس: "انتو عرفتوا ليه بأحترم أوى الست المصرية، ترجع الساعة 4 الصبح، مابقتش ست بقى.. بـ100 راجل وأتمنى صوتى يوصلها ولكل ست أنا مش شايفها.. أنا فيه ناس كتير مش بعرفها ومش بسمع عنها فالموجود يسمع يا يعمل يا يقولى وأنا إن شاء الله أعمل".
وتابع الرئيس عبد الفتاح السيسى: "والله أنا أتمنى أعمل كل حاجة حلوة للناس، خاصة الناس اللى ظروفها صعبة، واحنا بلد ظروفنا مش، الدولة مش غنية يعنى، على الأقل يبقى قلوبنا وإرادتنا، وربنا سبحانه وتعالى يعينا، أن إحنا نقدملكم حاجة على قد ما ربنا يقدرنا".
ووجه الرئيس الشكر للإعلاميين عمرو خليل، وريهام إبراهيم، خلال المداخلة الهاتفية، قائلا: "يا ريت نفضل بالأمثلة دى تبقى موجودة، وأنا بشكركم وأرجو تبلغوا الأستاذة ناهد كل اللى انتى عاوزاه هيكون".
وأكمل الرئيس: "الـ 5 بنات محتاجين رعاية لأن الـ 5 بنات سيكونون 5 أسر بعد ذلك.. وإحنا هندبر كل الاحتياجات، وكل سيدة تفعل ذلك هي تاج على رأسنا، ومن يجد مشكلة ليحلها يقولى علشان أحلها".
وعلقت السيدة ناهد جمال سعيد، سائقة التروسيكل، على استجابة الرئيس عبد الفتاح السيسى، لحالتها وظروفها الصعبة، قائلة: "أسعد يوم فى حياتى النهاردة علشان خاطر عيالى وجوزى.. أنا ربنا بيحبني".
وكانت ناهد جمال سعيد، سائقة التروسيكل، كشفت فى مداخلة هاتفية لبرنامج "من مصر"، أنها لجأت إلى العمل على التروسيكل بسبب مشاكل حدثت لزوجها، قائلة: "جوزى فى ظروف خارجة عن إرادته وحصلت له مشكلة ومش موجود معانا.. وهو كان شايلنا كلنا وجبت التروسيكل قسط علشان اشتغل عليه".
وتابعت ناهد جمال سعيد، أن لديها 5 بنات، مضيفة: "شقيانة علشان أعلم عيالى.. واللى أنا فيه دلوقتى علشان يعيشوا عيشة مرتاحة ومايبصوش لحد".
وأضافت: "فيه ناس بتضايقني لما بشتغل على التروسيكل ولكن مليش دعوة بيهم علشان أنا بشوف أكل عيشي.. وكل اللى أنا طالباه رخصة كشك علشان تعبت من التروسيكل.. وطالبة ربنا يفك ضيقة جوزى، وأنا تبع مدينة أوسيم".
تم أضافة تعليقك سوف يظهر بعد المراجعة