مهندسة ومضيفة وموديل.. نسمة لعبت كل الأدوار فى سيشن لإثبات جدارة قصار القامة

صورة أخرى لنسمة

تحدث المصور محمد عاطف، عن كواليس الـ"فوتوسيشن"، لـ" اليوم السابع"، حيث قال: "أنا ونسمة كل فترة بنصور فوتوسيشن بيناقش مواضيع اجتماعية مختلفة زى التنمر اللى بيتعرض له البعض من الفئات المختلفة، ففكرنا نعمل المرة دى فوتوسيشن يبقى إلهام لناس كتير، بأن من حق قصار القامة إنهم يعملوا فى مهن مختلفة طالما لديهم نفس المؤهلات والقدرات زيهم زى غيرهم".

صورة أخرى

وتابع "طلبت من نسمة تفصل مجموعة من التصميمات لمهن مختلفة زى مهندسة ومضيفة طيران ودكتورة ومعلمة، وصورنا فى عيادات ومركز تعليمى وموقع تحت الإنشاء، والتصوير خد وقت 5 ساعات وحضرنا للتصوير أسبوعين، ومفيش صعوبات واجهتنا أثناء التصوير، بالعكس الناس كانت متعاونة معانا جداً، والحمد لله رد فعل الناس على فوتوسيشن فى السوشيال ميديا كان إيجابى جداً".

نسمة فى دور طبيبة

تحدثت بطلة الفوتوسيشن عارضة ومصممة الأزياء نسمة يحيى عن فكرة جلسة التصوير حيث قالت لـ" اليوم السابع": "صاحب فكرة الفوتوسيشن هو المصور محمد عاطف، واخترنا مهنا مختلفة عشان نوصل فكرة إن أى حد يقدر يشتغل فى أى مجال طالما لديه المؤهلات المطلوبة، واتصورت مهندسة فى موقع إنشاء كبارى مع بعض المهندسين واتصورت فى المطار بزى مضيفة طيران وفى مركز تعليمى وأنا بزى معلمة، واتصورت فى الكوربة، وأنا بدور عارضة أزياء".

نسمة فى دور عارضة أزياء

واجهت نسمة العديد من الصعوبات خلال تصوير الفوتوسيشن، والذى تحدثت عنه قائلة: "التصوير تم خلال ساعات محدودة وأنا اللى صممت الملابس وكنت بجهزها بنفسى وبحط الميكب أب لنفسى، وروحت كذا مكان، وده كان تعب بالنسبة لى، لكن اللى كان بيهون عليا الإرهاق هو فكرة الفوتوسيشن اللى عايزة أقول من خلاله إن إحنا موجودين ونقدر نعمل أى حاجة إحنا عايزين نعملها".

نسمة فى دور مدرسة

وعن سر اختيار نسمة لمهنة طبيبة ومهندسة وغيرها من المهن التى صممت ملابسها وظهرت بها خلال "فوتوسيشن"، قالت "اخترت المهن دى بالذات لأن مهنة مضيفة الطيران بتشترط طول معين، والهندسة لأنها مهنة شاقة وبتحتاج تفكير ومادام إحنا عندنا عقل نقدر كلنا نشتغل فى نفس المهنة بدون تمييز، واخترت مدرسة عشان نمنع التنمر وعارضة الأزياء، وطبيبة والشخصية دى استوحيتها من دكتور جراح بيقف على كرسى وبيعمل جراحة للمرضى، عشان أقول إننا نقدر نشتغل فى أى مجال ونثبت كفاءاتنا فيه".

نسمة فى دور مضيفة طيران

أرادت نسمة أن توجه رسالة من خلال "فوتوسيشن" والذى تحدثت عنها قائلة "الرسالة اللى عايزة أقولها أن أى حد قصير القامة أو عنده بهاق أو أى إعاقة وفاكر إن الاختلاف ده ممكن يمنعه من تحقيق حلمه، غلطان لأننا كلنا نقدر نعمل أى حاجة ونحقق ذاتنا طالما عندنا القدرة والمؤهلات اللى بيحتاجها أى مجال".

نسمة فى دور مهندسة

وأنهت نسمة حديثها بالتعبير عن حلمها الذى تريد تحقيقه فى المستقبل، حيث قالت "نفسى أكون مذيعة وأقدم برنامج تليفزيونى، وأوصل رسالتى للعالم كله وهى إننا موجودين ونقدر نعمل أى حاجة".