لقاء خاص أجراه تليفزيون اليوم السابع مع الفنانة نادية الجندي، حيث أعده محمد محسوب ، وأجرته نسرين فؤاد تحدثت فيه عن سر رشاقتها بعد ظهورها الأخير ونشرها "فوتوسيشن " يبرز رشاقتها، قائلة: أنا متصالحة مع نفسي أوي عايشة في سكينة جوايا معنديش صراعات وغل دايما فيه جوايا سكينة ومتصالحة مع نفسي جدا.
وأضافت: مش بس السكينة دا كمان حب الجمهور وردود الأفعال اللي حصلت الجميلة علي صوري بتقول إن ليا رصيد وحب كبير عند الجمهور وكمان اشتياق الجمهور ليا .
وتابعت : بحس إن الجمهور مشتاق ليا ودا إحساس بيخليني في قمة السعادة .
في سياق متصل قالت : لازم تحافظي علي نفسك وجمالك فلازم تحترمي جمهورك والفنان قدوة ولازم يلتزم بحاجات كتير أوي علي حساب متعته الشخصية لازم يتنازل ويلتزم ويتحرم من حاجات كتير لازم ينام بدري ويحرم نفسه من بعض الأكلات .
وقالت : أنا لا بشرب ولا بدخن وبمارس الرياضة وببعد عن الحاجات اللي بترهق البشرة والحاجات المرهقة عصبياً، متابعة : الفنان لازم يبقي ملتزم وقدام جمهوره قدوة وميسهرش.
وأضافت حب الجمهور إكسير الحياة وأهم شيء في حياتي وبيديني الطاقة الإيجابية وسعر سعادتي ، وخصوصا إني بتعب في شغلي وبلتزم أكون في كامل لياقتي وخصوصا إني بعمل أدوار صعبة وأكشن وفيها مجهود وعنف ومش أدوار عادية وبحتاج لياقة بدنية عالية.
وحول لجوئها للوصفات والأعشاب مثل العصير الأخضر وغيرها: مش بتجه لغير الوصفات الطبيعية ولا بحب أخد أدوية تخسيس وعمري ما خدتها وبعش الطبيعية والبحر كل ما هو طبيعي بحبه.
وتابعت : لما يكون الإنسان عنده إيمان قوي دا شيء كويس بيأثر عليه وبيجي بعده الرياضة وحب الجمهور والناس.
وقالت : أي خبر إيجابي عني بلاقي فيه تفاعل كبير من الجمهور عليه بكون مبسوطة جدا وسعيدة الحمد لله.
في سياق متصل قالت الفنانة نادية الجندي، عمري ما عملت عمليات تجميل الحمد لله وشي هو هو من يوم ما اتولدت وملامحي هيا هيا أنا ضد عمليات التجميل، دا فيه ناس ملامحها بتتغير بتقعدي تبصي لصورتها تقولي مين دي دي مفيش حتة معملتش فيها عملية تجميل بس أنا لأ عمري.
وأضافت: لازم أبقي نادية ، نادية اللي الناس عرفتها مينفعش أكون غير أنا مينفعش أغير نفسي، لكن إني أغير شخصيتي اللي الناس عرفتني بيها دي أنا مش بحبها .. ممكن أعمل كريمات وصفات بحبها لكن عمليات التجميل لأ.
وتابعت : فيه بعض الفنانات بقولهم مين دي؟ بسبب عمليات التجميل اللي بيعملوها: فيقولي: دي فلانة .. مش بحب يجي يوم من الأيام الناس يسألوا مين دي؟، فحد يقولهم : دي نادية الجندي.
وتحدثت عن أعملها خلال الفترة القادمة، قائلة : فيه مفاجآت ليا في الفترة الجاية لجمهوري .
تم أضافة تعليقك سوف يظهر بعد المراجعة