بعد استجابة الرئيس لاستغاثتها.. والد طالبة الدهس بأسيوط لتليفزيون اليوم السابع: الرئيس السيسى أب لكل المصريين.. ويكشف تفاصيل الحادث: سيارة نقل مرت على جسدها أثناء عبورها الطريق.. وتعانى تهتكا فى أمعائها "فيديو"

الأربعاء، 08 سبتمبر 2021 04:08 م

جانب من تغطية تليفزيون اليوم السابع

اضف تعليقاً واقرأ تعليقات القراء

وجه هشام ثابت، والد طالبة أسيوط، التى تعرضت لحادث دهس من سيارة نقل، الشكر للرئيس السيسى بعد استجابته وتوجيه بتوفير كافة أوجه الرعاية الصحية اللازمة والعلاج للطالبة منة، قائلا: الرئيس السيسى أب كل المصريين بيستجيب لأى حد بشكره جدا".

وأضاف والد طالبة أسيوط، فى تغطية خاصة أعدها محمد محسوب وقدمها عبد التواب: منة بنتى إنسانة طيبة بطلة سباحة بتحب الحركة أتمنى إن شاء الله ترجع أشوفها تانى قدام عينى تجرى وتقف، وإن شاء الله ترجع على خير.

وتابع: منة بتعانى من حادث.. عربية عدت على جسمها بالوزن التقيل فحصل تهتكات فى الأمعاء ومشاكل فى الحوض وبدأت مستشفى أسيوط الجامعى تعمل ليها فى جسمها تغيير مسار لكن حصل غرغرينا فى جسمها فى العلاج وكان هناك جزء لا يستجيب.

وأضاف: بعد الحادث الكبير اللى هى مرت بيها منة كانت بتعانى من خلع فى الحوض ومفصل الرجل وكمان دخل تراب ورمل جوة لحمها وجسمها ودا سبب الغرغرينا وابتدى يحصل تلوث فى أجزاء من جسمها ومستشفى أسيوط حاولت تساعد لكن الموضوع كان كبير ومحتاج تدخل أكبر.

وذكر: حالة منة كانت بتستجيب بصعوبة للعلاج فكنا بندخل العمليات مرة واتنين وتلاتة فى اليوم ونعمل عمليات نضافة غير تحويل المسار.

وعن ظروف وقوع الحادث قال: منة كانت بتعدى الطريق حوالى الساعة 3 العصر وهى بتعدى لقت عربية نقل واقفة على الرصيف العربيات، مجرد ما نزلت على الرصيف ابتدت تمشى العربية راحت بسرعة معدية على جزء من جسمها طبعا فضلت تصرخ وتخبط على أساس إن هو يقف هو كمل طريقه وكمل على طول وجرى طبعا ما وقفش بالعربية.

وقال: الناس ولاد الحلال في المكان دا بعد ما السواق هرب بالعربية طلعوا تليفونها واتصلت بينا وطلبوا عربية إسعاف والناس وهيا بلغونا باللي حصل وهيا كانت فايقة وبلغتنا باللي حصل وبتكلمنا عملنا لها فحوصات في مستشفى خاص، لقينا أن ما عندهاش فضلات الحوض وقالوا هترتاح شهرين.

واستكمل حديثه: أن منة جت تنزل رجليها بعد كدا كشفوا عليها لقوا أن فى الإمعاء بتاعتها نازلة فى جسمها، وأن حصل فيها تهتك، فطبعا نقلونا بسرعة بعربية إسعاف على المستشفى الجامعى، ودخلت على الفور على مرافق العمليات، وابتدوا يعملوا لها عمليات ساعة ونص لحد ما بدأوا يحاولوا يشيلوا الأجزاء اللى فيها مشاكل وعملوا فتحة تغيير مسار فتح الشرف.

وأضاف أن منة فقدت جزء كبير من انسجتها العضلية، متابعا: "منة" عملت عمليات تنظيف مضادات حيوية قوية لكن استجابتها للأدوية لعمليات النظافة كانت بطيئة وعملت أربع عمليات نظافة لكن مفيش فايدة.

كان قد وجه الرئيس عبد الفتاح السیسی، بتوفير كافة أوجه الرعاية الصحية اللازمة والعلاج، للطالبة منة الله هشام حسن ثابت بالصف الثالث الإعدادي، البالغة من العمر 14 عاما، من محافظة أسيوط، والتي كانت قد تعرضت لحادث دهس من سيارة نقل، وذلك حتى تتمكن من ممارسة حياتها بشكل طبيعي.