أنغام: "فضلت 10 أيام ممنوعة من الأكل والشرب وكنت زى اللى واقع عليه بلكونتين"

تحدثت الفنانة أنغام عن آخر تطورات حالتها الصحية، قائلة: "الحمد لله اللى مريت بيه لم يكن سهلا، لكن كانت هناك قلوب كثيرة ودعوات وصلوات وحب ولما تبقى في محنة وتشوف الحب والدعوات التي تصل للسماء بتعرف قد ايه حب الناس".

وأضافت خلال مداخلة هاتفية ببرنامج الحكاية مع الإعلامي عمرو أديب: "بشكر ربنا وبشكر كل الناس اللى دعولى وصلولى ووولعوا شموع في الكنائس من أجلى.. وأشكر كل الناس التي زارتني في المستشفى.. في ناس كانت تزورني كل يوم وعاوز اشكر أهلى وأخواتي وأولادي وأمي التي تعبت كثيرا عاوز اشكر كل الناس".

وتابعت الفنانة أنغام: "أنا في مرحلة التعافى حاليا ومجهدة شوية بسبب الفتح الجراحى والمضاعفات القوية التي أخذت فترة أكبر من العملية والتي كانت أشد وطأة.. وجسمى يتعافى شوية شوية.. وانا بحاول اتفاءل ومعلوماتي ان اى حد بيفتح بطنه ممكن بحصله التصاقات وربنا ما يكتبها على أى حد أنه يحصله النوع ده من المضاعفات".

وأكملت الفنانة أنغام: "أنا كنت ممنوعة تماما لمدة 10 أيام من الأكل والشرب والأطباء سمحولى بالشوربة والسوائل ثم قالولى كلى.. والحمد لله بأكل واشرب واتمشى علشان ما يحصلش ان أمعائي ترتخى"، متابعا: "انا زى اللى وقع عليا بلكونتين مع انى والله ما أهملت كان اكبر همى حفلة الكويت وحفلة مصر وكان عندى أمل انى اقدر اغنى بعد العملية حتى ولو وأنا قاعدة وانا بحس بمتعة في شغلى ولكن الأمور تسير وفقا لإرادة ربنا.. أنا دايما القرآن شغال في أوضتى قبل التصوير والتسجيل.. وبحاول اتصدق وافدى الأمور بأمور كثيرة وإن شاء الله قدامى أقل من شهر وملتزمة بحفل في الكويت".