قدم تليفزيون "اليوم السابع" بثا مباشرا قدم خلاله "على جلال" مدرس لغة فرنسية وصاحب موهبة شعرية بدأت معه بوفاة والدته بعد أن رثاها بالعديد من الكلمات التى نالت إعجاب وثناء المقربين منه، فسلك هذا المجال.
وقال "على جلال"، 34 عاما مدرس لغة فرنسية، مقيم قرية الهوابر التابعة لمركز ديرب نجم، إنه كان يكتب الشعر منذ طفولته لكن لم يخبر أحدا بذلك، وبعد وفاة والدته اكتشف موهبته الشعرية، خاصة بعد رثائها بالعديد من الأبيات باللغة العامية.
وتابع، أنه بدأ الكتابة مبكرا ولكن لم يحتفظ بالأبيات التى دونها، ولم يكن يخطر فى عقله أنه يوما ما سوف يسلك هذا الطريق، وكان موت أمه هو الحزن الأكبر فى حياته ومع سماعه قصيدة "العمة يامنة" للخال الشاعر عبد الرحمن الأبنودى، ومع بداية "هشام الجخ" في عودة الشعر العامي إلى الواجهة وجد نفسه يكتب أبياتا شعرية، ويحاول كل مرة أن يصبح تجربة شعرية مكتملة وحضر أكثر من أمسية في محافظة الشرقية وخارج المحافظة، وشارك في العديد من المسابقات التابعة لمراكز الشباب وحصل على المركز الأول والمركز الرابع فى العديد من المسابقات.
ومن كلمات قصيدة" أمى ضحكة بتتألم" للشاعر على جلال
أمّى ضحكة بتتألم
كبرت سنيني
ومهما العمر بيعدى
ف حضنك
بشوف الطفل جوايا
واحط الراس على رجلك
ومهما كان تقل الهموم
تنزاح همومي
وانسى شقايا
والاغى فيكى حبيبتى ياحلوة
يرجع شبابك وينطق لسانك
اتلم ياد ياناقص ربايا
عارف يا بنى نفسى ف ايه
ايه يا أمّى ؟
نفسى أزور النبي
وجنب منه أرفع دعايا
هو دا حلمى ورجايا
عنيا يامّا تؤمري
دا رضاكى عنى هو منايا
وتضحك أمي
أشوف ضحكتك بدر اكتمل
جماله بيغازل عيون الصبايا
وتحطى ايدك على شعري
ينتفض قلبي
كإن إيدك دوا لكل الجراح جوايا
زى المطر ما داعب غصون الشجر
لاجل ما يكتب باسم الحنان
أجمل حكاية
حتى لمّا أعلِّى صوتي
حتى فى ساعة سكوتى
حتى لو قسيت عليكي
حتى لو تعبت قلبك
حتى لو بعدت عنك
بنص كلمة تسامحيني
و تمحى كل الخطايا
ويفتح قلبك بيبانه
تعالى ف حضنى ياضنايا
وارجع بسنينى اللى عدت
فتحت على صوتك
فـ حضنك
ياناسية لفرحتى حزنك
ياضحكة جواها بيتألم
ياساكتة حنانها بيتكلم
بتغذى على روحك ... من دمك
واهبالنا حياتك سنينك شبابك
وناسية الدنيا قدامك
لا عايزة رد الجميل
ولا التمن همك
فاكرة يامّه يوم نجاحي
صحيح يا حبيبي
نمرك كبيرة فـ الامتحان
فرَّحت قلبي
اوعى تكون بتضحك
عليا عشان مبقراش
وتجرى تسمعى نتيجتي
م الجيران
ياااه ع الفرحة ف عنيكي
قصادها الدنيا متسواش
...
وتعبتى يامّه
من شيل هموم الكل
رقدتى والعيا حل
يامَّه الحياه من غيرك حنانك..ذل
حتى فـ عياكي
كلت يابنى ؟
أخوك رجع؟
اطّمن على اختك
ياستى كلنا حلوين
انتى اللى كلتى ..
أخدتى يا امّه دواكى ؟
يامّه .. صحتك هى الأهم
غلبت ياما معاكي
ناقص ترتبيلنا الهوا
نتنفس
وناسية هواكى تتنفسيه
دا حتى علاجك بتوفريه
خد ياد هقولك
خد الفوس دى واشترى كتبك
أو اشترى القميص اللى عاجبك
كتب إيه وقميص إيه
أعمل إيه بس فى حنانك
يامّه قومى .. بالله عليكي
دى الدار من غيرك خراب
والشيبة ف وجودك شباب
السما لو صافية فـ غيابك ضباب
إحنا الدروس و القلم
وانتى الكتاب
يامّه قومى .. بالله عليكي
وتصحى أمي
فـ نصاص الليالي
تغطينا ..
تدور ع النايم تغطيه
ع اللى بيتالم تداويه
واللى راجع تغذيه
واللى زعلان تراضيه
هاحكى عن إيه ولا إيه
دورت ف كل وش وكل قلب
أحلى طلة طلة أمي
أصفى حب
أمّى طوق النجاة للغريق
هى اللمة ف الوحدة وهى الصديق
ولما يخون الصحاب هى الرفيق
أمّى شمعة بتحرق نفسها وتنور لينا الدروب
أمّى الجنة ف حياتنا
وببصة رضا منها تزول الكروب
اللى زعل أمّه ياخيبته
الحق بوس تراب مداسها وتوب
دا رضا ربك من رضا امك
ورضا ربك عليك مكتوب
