لست من النوع الذى يحب الأسماء والصفات فأنا لا أحب أن يقول أحد أننى خفيف الدم أو رأسى ناشفة أو أي شيء من هذا القبيل، لكننى أرى أنه فى المقابل من حقى إطلاق الصفات على المضحكين الجدد أصحاب الفيديوهات الكوميدية على الفيس بوك، والمضحكون الجدد هم من يقومون بهذا الدور عبر السوشيال ميديا. يعنى انت بتشتغل ايه مضحكاتي؟ يقولك آه عادي. طب ماشى.
أتكلم عن شباب يجمعون حولهم زملاءهم لإلقاء النكت على السوشيال ميديا. أنا لست معترضا على الفكرة. لكن المشكلة إن العيال دمها مش خفيف. لا اللى بيقول ولا اللى معاه، باستثناء خمسة ستة.
"هييجى واحد يقولك وانت مالك، أنا ماليش والله يا باشا، أنا بقول رأيى عادى"، أنا مشكلتى بالإضافة لما سبق أن طريقة الإضحاك واحدة، نفس المنهج والأسلوب الذى يعتمد على "الأفورة" ومجموعة الشباب أصدقاء صانع المحتوى اللى جايين يضحكوا على النكت والمواقف كأنهم جمهور مسرحية كوميدية.
هييجى واحد تانى ويقولك ياعم اقلب القناة.. صدقنى مش قادر.. خش هتجيبك، كل ما افتح سوشيال ميديا ألاقى خمسة ستة عاوزين يضحكوني، يا جماعة لا بد من إعادة تفكير فى المحتوى الكوميدى.
المحتوى الكوميدى السائد يتتبع الموضة والموضة السائدة فيديوهات التريقة على عجائب السوشيال.. التريقة حلوة مفيش كلام بس ليه مفيش بربع جنيه ابتكار؟
هناك طرق عديدة لإنشاء محتوى كوميدى منها المحتوى القائم على فكرة من ابتكار مؤلف يتولى تنفيذها مع آخرين، وهذه فى اعتقادى أنسب وأفضل فكرة لمحتوى كوميدى وهناك أيضا المحتوى الكوميدى المصاغ فى صورة أنيمشن، أو المحتوى الكوميدى الناقد للظواهر المجتمعية الذى يعرض فى شكل حكاية لطيفة عناصرها محدودة "نفرين تلاتة" خصوصا إذا كان من يقدمه شخص أو اثنين ذوى حضور. أما التريقة على خلق الله فى فيديوهات كوميدية فهى مضيعة للوقت وإن كانت مضحكة. خصوصا إذا كانت هذا ما يفعله صانع المحتوى طول الوقت.
نأتى لبرامج اليوتيوب المصنفة "كوميدى" والمصروف عليها، والاختيارات فيها عجيبة. ولا واحد دمه خفيف. والسبب إن كلهم عيال "فافى" من طبقة "الهاى كلاس" وهذه النوعية من الشباب لا يمكن تضحك حتى طوبة فى الشارع .. صدقنى .. أنا اللى عارف... ممكن الشباب من النوعية المذكورة يكونوا دمهم خفيف فعلا لكن يضحكوا الناس لأ .. لازم عيال من الشارع .. من الطبقة المتوسطة، وبعدين ليه كل الشباب "اللى بيضحكوا" قالبين الطواقى ولابسين الكابات بالمقلوب. عدة الشغل مثلا. أفهم إنك تعمل الشغل ده فى البداية لكن بعد الشهرة والفلوس لازم يحصل تطور، ولا إيه يا كباتن!
تم أضافة تعليقك سوف يظهر بعد المراجعة