جذب الأنظار إليه منذ طلته بالجلباب المخطط والطاقية البنى وهو يبيع ورق اليانصيب فى شارع عماد الدين ويحاول بخفة ظله أن يخدع على بطل مسلسل عمر أفندي ويسرق منه محفظته ويجرى مسرعًا إلى "المعلمة" حتى يثبت لها جدارته فى السرقة، كما استطاع خداع عمر أفندي مرة أخرى والإفلات منه فى إحدى الحلقات حتى صادفه فى أحد الشوارع، هو الفنان الطفل جان رامز الذى تحدثنا معه ومع والدته عن دوره بمسلسل عمر أفندى الذى يعرض حاليًا على قناة "أون تى في"، وكواليس تحضيره للدور وتعامله مع فريق العمل من النجوم والنجمات.
والدة جان رامز: بيمثل بتلقائية وهو حرامى كيوت بالمسلسل
قالت والدة الطفل جان رامز لـ " اليوم السابع" عن ترشيحه لدور اللص فى مسلسل عمر أفندى :" الشركة أرسلت لنا الورق وإحنا شفنا إنه دور مختلف خالص ومش مكرر كتير على الشاشة فوافقنا عليه". ونفت تدخلها فى تأدية أدواره قائلة: "جان بيمثل بتلقائية ماحدش فينا سواء أنا أو والده بنوجهه وعادة فى لوكيشن التصوير مفيش حد بيوجهه بنخليه بتلقائيته لكن مثلًا ممكن نقوله على حركة زى هو طلع فى مشهد بمسلسل عمر أفندى وهو ماسك طرف الجلابية ببقه، دى من عندنا إحنا قلناله عليها"، وتابعت ضاحكة "هو حرامى فى المسلسل بس حرامى كيوت".
وعن تحضير ملابس اللص التى ظهر بها جان فى مسلسل عمر أفندى، قالت والدته: "تحضير ملابس اللص اللى ظهر بها جان من مسئولية ستايلست المسلسل وبهدلت الجلابية شوية عشان الموضوع يبان واقعى ونصف شبشب قديم جدًا، شكل القبقاب تعبه جدًا فى اللوكيشن".
الطفل جان رامز: أنا أصلا أروبة واتعلمت من الفنان الراحل أحمد زكى
أنا أصلاً أروبة، وعشان أضيف للشخصية أتفرجت على مشهد للفنان الكبير أحمد زكى وهو بيجرى وماسك طرف الجلابية فى بقه واتفرجت على المشهد ده عشر مرات عشان أقلده فى المشهد، والحركة دى مكنتش موجودة فى الاسكريبت".
النجمة ميمي جمال والطفل جان رامز
جان رامز: جلابية اللص كانت ريحتها وحشة وكنت بعقمهما
وتابع: "شخصية اللص كانت شخصية حلوة جدًا واستمتعت بيها، رغم إنها كانت متعبة حبتين يعنى جلابية الشخصية ريحتها وحشة وكنت كل يوم أعقمها وكل يوم يلزقوا الطاقية بلزق على شعرى وده اتسبب إن خصلات من شعرى بتطلع مع اللزق، والشبشب وأنا ماشى بيه بحس إنى لامس الأرض والأرض كانت ساخنة وبتلسوع رجلى لدرجة إنهم كانوا بيشيلونى هناك".
وتذكر الطفل جان رامز كواليس مسلسل عمر أفندى، فقال: "الكواليس كانت عسل جدًا بأمانة يعنى كنت كل يوم أروح الصبح بدرى، وأسلم على أستاذ أحمد حاتم وأستاذ عبد الرحمن أبو غزالة، وأستاذة آية سماحة وفريق عمل المسلسل كله، وأنبسط جدًا بمقابلة أستاذ محمد رضوان، وطبعًا الفنانة الكبيرة أوى ميمى جمال فرحت جدًا إنى أقابلتها".
جان رامز عن تمثيله أمام النجمة القديرة ميمى جمال: كنت حاسس إنى بحلم
وعن العمل مع النجمة القديرة ميمى جمال، قال: "كنت حاسس إنى أنا بحلم، دى مدام ميمى جمال مش أى حد، قبل ما أصور معاها كنت خايف أتلخبط لأن اسمها لوحده كان بيخوفنى، ومكنتش مصدق إنها قدامى واتعلمت منها حاجات كتير زى إنى أمثل كويس وأكون كوميديان كويس، بصراحة بحبها جدًا واتعلمت منها إزاى أمثل أى دور".
النجمة ميمى جمال والطفل جان
جان رامز: اتعلمت من أحمد حاتم التواضع وإزاى أبقى كوميديان
وعما تعلمه من تمثيله أمام الفنان أحمد حاتم بطل مسلسل عمر أفندى قال: "اتعلمت منه إزاى أكون كوميديان، وإنى أكون متواضع، عشان هو متواضع جدًا فى اللوكيشن".
أحمد حاتم وجان رامز بمسلسل عمر أفندي
جان رامز يحكى المواقف الكوميدية التى جمعته بأحمد حاتم
وعن المواقف الطريفة التى جمعت بينه وبين الفنان أحمد حاتم، قال ضاحكًا: "مرة كنت بصور ودرجة الحرارة كانت 41 وخلصت تصوير وكان الأستاذ أحمد حاتم لسه بيصور فقولت له خلاص أنا بعد أذنك هروح أقعد فى التكييف بقى".
مشهد يجمع بين جان رامز وأحمد حاتم
وتابعت والدته: "أستاذ أحمد حاتم كان متواضع أوى فى اللوكيشن وكان بينزل لسن جان وهو بيتعامل معاه عشان يجيب منه أحلى أداء".
جان رامز: نفسى أبقى ممثل ومخرج ومثلى الأعلى أمير كرارة
وعن أمنية جان المستقبلية، قال: "نفسى أبقى فى المستقبل ممثل ومخرج". وأشار إلى أن مثله الأعلى فى مجال الفن هو النجم أمير كرارة الذى ظهر معه فى دور ابنه بفيلم "البعبع"، حيث قال: "مثلى الأعلى هو الأستاذ أمير كرارة، لأنه فنانى المفضل وبحبه أوى، وهو فنان كبير أوى، وبيحبنى جدًا، وبيعمل الأدوار كلها من كوميدى لتراجيدى كل حاجة، أنا بحبه جدًا وكفاية أنه باشا مصر".
الطفل جان رامز بدور لص فى مسلسل عمر أفندي
جان رامز
تم أضافة تعليقك سوف يظهر بعد المراجعة