نشطاء "فيس بوك" يرصدون القواعد الأربعين لركوب الميكروباص.. ويؤكدون: فى الميكروباص أنت مُسَيَّر مش مُخَيَّر.. ولازم تبقى رياضى وعندك لياقة.. ولو السواق مشغل أغانى أجنبى اعرف أنك مخطوف

يعتبر "الميكروباص" من وسائل المواصلات التى يستخدمها معظم المصريين بشكل دائم فى حياتهم اليومية، وركوب الميكروباص فى مصر ليس بالمهمة السهلة والهينة حيث يتطلب قدرات بدنية ونفسية خاصة. لذلك بدأ النشطاء على موقع التواصل الاجتماعى الفيس بوك برصد خبراتهم اليومية فى الميكروباص عن طريق تقديم القواعد الأربعين لركوب الميكروباص ولكن بطريقتهم الساخرة المعتادة كعادة نشطاء موقع التواصل الاجتماعى الساخرة، حيث قاموا بتبادل العديد من العبارات والمقولات وعصارة خبرتهم التى من الممكن أن يتعرض لها راكب الميكروباص.

1- الصوت العالى دليل على ضعف الشخصية وفى الميكروباص بيدل على قوة الشخصية
2- السواق مش هيوطى الكاسيت.. أجل مكالماتك لحد ما تنزل وياه بقا لو السواق مجروح عاطفيا يارب ميوريك على الأغانى إلى بيبقا مشغلها
3- سيجاره السواق دى من المقدسات.. ماينفعش تقوله يطفيها
4- لازم تبقى رياضى وعندك لياقة علشان تعرف تقفز منه وهو ماشى لأنه مش هيقف وتجرى عليه فى الزحمة
5- جهز أجرتك من قبل ما تركب ولازم يبقى معاك فكة
6- متوقفش قبل تحويده عشان لو الميكروباص وقفلك الناس اللى وراه مش هتسيبه فى حاله عشان قافل عليهم الطريق
7- ابقى قوله على المكان اللى انت نازله قبلها بشارعين على الأقل
8- وافق السواق فى أى موضوع هو بيتكلم فيه عشان متدخلش فى حوارات مالهاش لازمة.. السواق دايماً على حق
9- الكرسى اللى جنب السواق ده للمزز بس.. ماتفكرش تركب فيه عشان تبقى ضيف لطيف
10- ذوق سواق الميكروباص فى اختيار الأغانى والدباديب اللى فى العربية دى حاجه مبنية على جرح قديم ومش قادر ينساه ومش موضوع للمناقشة
11- المكتوب على ضهر الميكروباص دى حكمة السواق اللى مقتنع بيها مش حاجه بتضحك.
12-ربطات الحجاب العجيبه بتاعه البنات ممكن تضايقك وانت قاعد.. حاول تتجنبها بهدوء.
13-لازم يكون معاك كمامه صغيره.. هتشكرنى بعدين على الفكره دى
14-دايماً هتلاقى واحد بيفاصل فى الأجره مع السواق.. ده وحش سيبك منه لأنه بياخد نصيبه من السواق كويس.
15- عينك على جيبك طول الرحله تجنباً للسرقات
16- صور الطفل المعاق اللى هتلاقيها ده غالباً ابن السواق او ابن أخته.
17-اللى نازل الأول بيركب برة.
18-انت متحرش فى نظر أى بنت حتى لو لابس بدلة.. خليك عينك على جيبك زى ما قولنا عشان فى بنات ما بتصدق يلاقوا حد بيبصلهم.
19-فى الميكروباص انت مسير مش مخير.
20-كونك انك تمد ايدك للميكروباص اللى جنبك عشان تجيب منه فكه للسواق ده واجبك وانت مش بتخاطر بحياتك ولا حاجة.
21-متفكرش تبتسم.. انت فى ميكروباص ومفيش أى حاجه تدعو للابتسام.
22-متطلعش موبايلك جوه الميكروباص عشان بيبقى ملكية عامة وبيبقى على الأقل 4 مركزين فى ال News Feed بتاعة فيس بوك مش انت لوحدك.
23-فى بنى آدمين كده الميكروباص بيدوس عليهم وهو ماشى.. مالناش دعوة.
24-الكلاكس بتاع السواق ده مش لتنبيه السواقين اللى حواليه.. ده بيت مع الأغنية اللى هو مشغلها.
25-الميكروباص مش بتاع حارات.. بتاع غرز.
26-كوبايه الشاى الفاضيه جنب السواق دى تقريباً الميكروباص بينزل بيها.. زى برضه الراجل التخين ابو شنب اللى دايماً تلاقيه جنب الإزاز وعلى رقبته فتافيت مناديل.
27-لو قاعد جنب الباب هتلبس فى فتحه وقفله لباقى الركاب اللى داخلين وخارجين.
28-قواعد المرور بالنسبه للسواق دى مجرد إرشادات وتسقط منها صفة الإلزامية.
29-لو لقيت السواق مشغل أغانى أجنبى اعرف أنك مخطوف.
30-بلاش تبصى فى المراية لحسن هتلاقى فيها السواق بيلاعبلك حواجبه ولو حصل اتكتمى يا يجيب وشك بمطوة
31-الكرسى القلاب كل الطالع والنازل لازم يقومك بلاش منه
32- ليه تمد ايدك علشان تقفل باب الميكروباص لما ممكن السواق يزود السرعة ويوقف مرة واحدة هتلاقى الباب اترزع لوحده ومش مشكله انه يجيلك ارتجاج فى المخ أو دماغك تسلم على دماغ اللى قدامك عشان يقفل الباب
33- ديما السواق يقول لأى حد أبو اللى ركبك عربية وهو أصلا اللى بيكون غلطان
34- علشان تفخم نفسك وتحس انك متميز ممكن تركب جمب السواق لوحدك وتدفع أجرة شخصين
35-بلاش كلام فى السياسة فى الميكروباص علشان الليلة بتقلب فى الآخر
36- الأربعة اللى على الكنبة الواحدة لازم يقعدوا بالشكل ده • ° • °
37- ماتنساش تقول الشهادة قبل ماتركب الميكروباص
38- لو المسافة صغيرة المشى أرحم ليك
39- متركبش ورا السواق عشان هتلبس فى لم الأجرة
40-وأخيراً.. السواق مش بيقف.. الميكروباص بيفضل ماشى ولما سيادتك تيجى تنزل بيهدى بس.. وانت ولياقتك بقى.


موضوعات متعلقة


صفحة الملك فاروق تنشر لوحة فنية عن مقتل "كليبر" على يد سليمان الحلبى.. الطالب السورى اغتال القائد الفرنسى بعد عامين من قدوم الحملة الفرنسية لمصر.. وحكم عليه بحرق يده اليمنى ثم إعدامه على "الخازوق"