بنات الـ ... "شاطر"

سألتنى صديقة: هل تعرفين حد من "الإخوان" بما أنك تكتبين عنهم وتتابعين نشاطهم؟
قلت لها: بالطبع أعرف بعضهم ... لكن بتسألى ليه؟
قالت: علشان عايزة وساطة لولاد الشاطر

قلت لها: ولاد الشاطر مين؟
قالت: زهراء وخديجة بنات "خيرت الشاطر" أصحاب إحدى المدارس الخاصة
قلت لها: هل ضاقت بك كل المدارس لتذهبى لمدارس الإخوان وتعلمى أولادك سلوكيات تندمين عليها فى يوم من الأيام ..

قالت: لا .. واضح أنك ما تعرفيش المدرسة والدخول فيها بوساطة .. والغريبة أن مصاريفها باهظة لا يقدر عليها إلا قلة من الشعب المصرى .. تصورى الـ" كى جى وان" بـ25 ألف جنيه ..
قلت لها: وأنتِ معاكى المبلغ ده؟
قالت: لأ .. الوساطة علشان قريبة لى بتعمل مدرسة فى المدرسة.
قلت: ومشكلتها إيه؟

قالت: بيخلوهم يوقعوا على عقود احتكار كشرط أساسى فى التعيين وبعض المدرسات والمدرسين رافعين قضايا على ولاد الشاطر علشان خاطر هذا البند الجائر؟

الحقيقة استوقفنى فى هذا ثلاثة أشياء .. أولها أن نساء الإخوان البيزنس بتاعهم دايما فى التعليم فهناك مدارس "بنات مشهور فى أسيوط التى تمتلكها ابنته وفاء المرشحة على كوتة المرأة بالمحافظة؛ وهاهم بنات الشاطر يغزون سوق التعليم بمدارس "هاى كلاس" لا يقدر عليها إلا علية القوم .. الشىء الثانى يا ترى إذا ما الإخوان لا قدر الله وصلوا للحكم حيبقى التعليم بكام؟ وعائلة الشاطر التى تتحدث نهارا وليلا عن الظلم الواقع عليهم وحبس والدهم "خيرت الشاطر" ويعيدون ويزيدون فى أنهم مضطهدون ... بالله عليكم من هو المظلوم؟ الشىء الثالث والأهم ..هل وزير التربية والتعليم أحمد زكى بدر قام بزيارة لهذه المدرسة فى الهضبة الوسطى بالمقطم وعرف نساء الإخوان بيعملوا إيه فى التعليم؟