مصر بعد 25 يناير أحلى من مصر اللى كانت قبلها

مصر اللى كنا نعرفها خلاص اتغيرت.. الإعتراف بهذا الأمر أصبح واجب خاصة بعد المشاهد اللى كلنا شوفناها فى ميدان التحرير قبل تنحى الرئيس، أو المشاهد اللى شوفناها فى شوارع مصر بعد التنحى وكل شباب مصر بينظفوا طرق وأرصفة شوارعهم وحواريهم..

مصر قبل 25 يناير غير مصر بعد 25 يناير ..مصر قبل كان التلفزيون الرسمى فيها يسبح بحمد الرئيس، ومصر بعد تلفزيونها ميهموش أى رئيس.

مصر قبل كانت فيها الرؤوس محنية قدام ضباط الشرطة، ومصر بعد فيها ضباط شرطة بيحضنوا المواطنين وبيقولوا لو سمحت وبعد إذنك..

مصر قبل شبابها كان بيتحرش بأى مؤنث يعدى فى الشارع، ومصر بعد شبابها كان بيوسع للبنات تعدى فى عز زحمة ميدان التحرير..

مصر قبل الناس فيها كانت بترمى الزبالة فى الشارع من غير كسوف، ومصر بعد الشباب فيها بينضف الشوارع ويدهن الأرصفة ويزرع الشجر وكأنه بيتفسح..

مصر قبل الناس فيها كانت بترفع الأعلام بعد نهائى كأس الأمم الأفريقية، ومصر بعد الناس فيها بترفع الأعلام كل يوم جمعة..

مصر قبل ليلها كان كوابيس ومستقبلها أسود وبراحها ضيق، ومصر بعد ليلها أحلام وردية ومستقبلها بينور أبيض وبراحها واسع للكل..

مصر بعد 25 يناير بالتأكيد أحلى بكتيير أوى من مصر قبل 25 يناير أعادت اكتشاف نفسها وولادها وناسها وصحيح لسه فى مشاكل ولسه فى سلبيات ولسه فيه أخطاء وفيه مجموعة من المستغلين والنصابين استغلوا الظروف وسرقوا الأراضى الزراعية وبيمشوا بعربياتهم عكس اتجاه وبيبلطجوا وبيسرقوا بس دول نفسهم قصير ولن يصمدوا أمام طوفان الإلتزام وإحترام القانون القادم..وبغض النظر عن حلاوة مصر بعد 25 يناير إلا أن مصر اللى فى النص كانت أحلى وأحلى.. مصر اللى شوفناها على مدار 18 يوم قبل تنحى الرئيس كانت مثالية وحلوة زيادة على اللزوم علشان كده يارب دايما أيامنا كلها تكون ثورة ..



ده اللمبى قبل الثورة واللى فى ايده دى الكراسة الصفراء الشهيرة بتاعة النقوط



وده برضه اللمبى بس بعد الثورة ، ولأنه مجدد بدل الكراسة بأجندة على اعتبار أننا بقينا فى عصر الأجندات



طبعا أبو حفيظة غنى عن التعريف .. قبل 25 يناير كان نجم موجة كوميدى ونايل كوميدى وكل شئ كوميدى



وزى ماغيرت الثورة الوطن العربى.. غيرت كمان نجوم الكوميديا وراحت على أبو حفيظة وبقى القذافى هو النجم.. ثورة ثورة ..زنجا زنجا .. إلى الأمام إلى الأمام



ده سنطاوى صاحب البت عبير.. قبل الثورة كان مقضيها حب على كوبرى قصر النيل والكورنيش



بعد الثورة عبير طلبت التغيير وبدل من أسدين قصر النيل طلبت من سنطاوى يحبها قدام الدبابة



دى صفحة ميدو فاكس على الفيس بوك..وميدو أهلاوى متعصب زى مانتم شايفين.. على فكرة مكنش بيشوف ماتشات المنتخب.



دى نفس الصفحة ..بس ميدو أضاف لإسمه لقب كنتاكى عشان يثبت أنه كان فى الميدان.. واكتشف أخيرا ان مصر هى اللى فوق الجميع



ده شاب سيس.. فرحان بنفسه وبفورمة الساحل وكل اللى بيتمناه يحضر حفلة تمورة



بعد الثورة الشاب السيس خلع الرئيس.. ودى صورته وهو عامل فورمة الوطنية أمام خيام الميدان