إيه بقى؟!ّ وانا هتحكم لوحدى بقى ولا إيه؟ ولا هى جات عليّا وقفلت؟! وبعدين أنا أول شخص قدمت برنامج رئاسى، ياريت لو ترجعوا لتاريخ مقالاتى وتقروا "برنامج رئاسى للبيع"، تأخرت فى إعلانى هذا، بعد فحص وتمحيص لجميع المرشحين، ولأن البطل لازم يطلع فى آخر الفيلم، البرنامج الرئاسى المطروح سابقاً سيطبق بحذافيره.. لكن لماذا غادة عبود؟!.
عندكم مرشح مولود 4 مايو، وهو نفس يوم ميلاد الرئيس السابق مبارك، أنا مولودة 5 مايو. واليوم بيفرق من حيث البصمة الفلكية والاجتماعية على الشخص.
عندكم مرشح آخر والدته أمريكية الجنسية، لكن والدتى إسكندرانية الأصل والمنشأ لجدى، أما جدتى فهى أيضاً إسكندرانية أجدادها من مدينة رشيد.
عندكم عدد 3 مرشحين عملوا مع النظام السابق. فمن أين سيأتون لكم بالتجديد، وهما خلاص حسن الختام؟
فى بلادنا العربية فقط، تلاقى صورة المسئول فى كل حتة من شمال البلاد لجنوبها، فوق المصنع، وتحت الكوافير!! عمرك ما هتمشى فى أوروبا والدول المتقدمة وتلاقى أى صورة لرئيس أو مسئول. فإذا كان هذا قدرنا، اختاروا بقى حد شكله حلو!!! عشان الشعب وهو رايح شغله الصبح، يصطبح على الوجه الحسن، يعنى إيه حسناء؟ يعنى كل ما تبصلها تحلو، يعنى غادة، مين غادة؟ أنا.
خلصنا من مقارنة المرشحين؟ إليكم غير البرنامج الرئاسى، مجموعة قرارات هنشتغل عليها كخطة عمل:
واحد: مبدئياً كرئيس جمهورية أنا ماخدش أقل من 5 ملايين جنيه فى الشهر فى الشغلانة دى، هل يعقل إن إحدى الممثلات عشان بتلعب حواجبها فى مسلسل رمضانى تاخد فلوس أكتر من رئيس مصر؟! وبعدين تزعلوا وتقولوا المسئول بيسرق! ما هو لازم يسرق طبعاً!! أنا 5 ملايين شهرياً يدوب يكفينى.
6 سنين فقط هى سنوات الرئاسة ولن أجدد أبدا، لكن قصر الرئاسة اللى هو فيلا فى الزمالك تنتقل ملكيته باسمى مكافأة نهاية الخدمة، بالإضافة إن رئيس مصر اللى هو أنا "أخرج واسهر زى بقية الناس، آكل درة مشوى وجلاس" فى الويك اند مع الناس زى الملك فاروق الله يرحمه، فعايزة حجز فى كل الأماكن لو سمحتم.
ثانياً: أنا مش عاجبنى اللى بيحصل فى الدستور ده، فخليهم يعملوا دستور، وأنا هاعمل استفتاء لإعادة استفتاء الدستور، المادة الأولى فيه قوله تعالى فى سورة البقرة "آمن الرسول بما أنزل إليه من ربه والمؤمنون كل آمن بالله وملائكته ورسله لا نفرق بين أحد من رسله وقالوا سمعنا وأطعنا غفرانك ربنا وإليك المصير." واخدين بالكم من قوله تعالى "لا نفرق بين أحد من رسله"، وبقية المواد هنكملها بما يتناسب مع دولة مدنية أساسها الرحمة والعدل والمساواة بين جميع فئات المجتمع.
ثالثاً: إلزام تدريس جميع المواد الدينية من قرآن وتفسير وتجويد وفقه وحديث لطلاب المدارس، حتى لا يكونوا مادة متلقية ساذجة لما يبث من جهل وفتنة من خلال الفضائيات المغرضة، وإلزام تدريس مادة عن الإخاء بين المسلمين والمسيحيين فى الوطن.
رابعاً: أبناؤنا فى سينا وفى النوبة يجب إشراكهم فى النسيج الاجتماعى للوطن الواحد، لازم يشتركوا بمن يمثلهم فى الدستور اللى أنا هاستفتى عليه من جديد، ما ينفعش نقول هما حتة مننا ودول جزء من مصر واحنا مهمشينهم، ولا إحنا واخدين المسألة غلاسة وخلاص؟ هو مفيش حد من النوبة غير محمد منير ولا إيه؟ لأ!! لازم يكون ليهم ظهور إعلامى ومشاركة ثقافية وسياسية اجتماعية.
خامساً: إلغاء مجلس النواب، هما الناس دول بيعملوا ايه بالظبط؟؟ إيه كمية طق الحنك اللى ع الفاضى دى؟ اللى عنده مشكلة يبعتها فى إيميل للمحافظ التابع للجهة اللى هو منها، والمحافظ بعد كده هو اللى مسؤول قدامى، بس خلاص.
سادساً: يجب تطهير الإعلام من لغاليغه، بناءً عليه قررنا تفجير مبنى ماسبيرو باللى فيه، العيب مش فى المبنى، العيب فى من يفكر وينفذ، وخلاص عندما يتمكن منك المرض فلا سبيل إلا الإبادة، طب واللى فى الفضائيات؟ ذكرت سابقاً تجديد السجون فى برنامجى الرئاسى، أكيد مش بصرف فلوس ع الفاضى؟ كلهم يشرفون فى السجن، سجن يحترم الآدمية، لكن يمنع عنهم أى تواصل من أى نوع.
يفضلوا يندهوا يجاوبهم الصدى، لحد ما يخلصوا على صداهم، أو صداهم يخلّص عليهم، كما نصدر قرارا بمنع التوك شو نهائياً، بلاش كلام فارغ!! بدل ماسبيرو هنبنى هرم جديد فى نفس المكان، يشترك فى بنائه الشعب كله، فى الهرم ده، هنعمل متحف شمع زى متحف مدام توسو فى لندن.
سابعاً: أنا بصيت فى الخريطة لقيت مصر واسعة جدا، مزنقين على بعضكم ليه؟ فى مساحة كبيرة شرق البلاد فاضية. بناء عليه قررنا. أى حد اتجوز من 2001 وطالع سيتم نقله بالعافية لمدن سكانية يتم بناؤها سريعاً فى الأماكن الفاضية دى، وده معناه فروع لشركات أكتر، فروع لمحلات ومراكز أكتر،ج وازات وصداقات جديدة، تعترضوا تصوتوا ده قرار نهائى والحل الوحيد.
أظن خطة عمل ممتازة شرحت فيها واجباتى وحقوقى، يجب على كل مواطن قبل أن يعطى صوته، أن يعطى صوته لمستقبل وخطة واضحة، مش فلان لذيذ ياختى عليه، وفلان مش ظريف يايّاه عليه!!.
افتكروا إن الجنسية والأصل والفصل ما منعوش ناس كتير من الظلم والجبروت، اختاروا الشخص اللى فاهم إن الوطنية عطاء مش سبّوبة، اذهبوا سريعا إلى الشهر العقارى واعملوا توكيل باسم غادة عبود.
