مكتوب فى بطاقتى الشخصية
أنا دمى سكر زى النيل
وملامحى ملامح مصرية
والنيل مرسوم جوه عروقى
وعيونى عيون فرعونية
وخدودى جبالك وهضابك
وصوابعى صوابع عسلية
وشفايفى بأسمك موشومة
وصوتى نغم سمسمية
***
مكتوب فى بطاقتى الشخصية
الصبح أنا بفطر على شوفك
وعشايا حبك يا بهية
والليل بتمشى على شطوتك
عاشق لياليكى السحرية
والقلب معلق فى هواكى
على قد ما كان عشقك ليا
وكمان مكتوب جوه بطاقتى
أنا مصرى وأمى مصرية
مولود من جوه رحم أرضك
من طينك كحلت عنيا
والحبل السُرى كان نيلك
مفطوم على كلمة حرية
والنبض اللى يدب فى قلبى
خطوات الناس رايحة وجيا
ومساجدك وكنائسك شاهد
على روح الوحدة الوطنية
مكتوب فى بطاقتى الشخصية
فتاة
