- فى البداية.. ما سبب تقديمك للاستقالة؟
زهقت.. وقرفت.. بقالى 3 سنين شايل الطين ومش عاجب كتير عليّه قوى كده وفى الآخر بنتهاجم.. وبزعل قوى لما حد يقول اتحاد فاشل بس دى الحقيقة.. بس يلعن أبو الكرة والرياضة اللى تعمل فى الواحد كده، زعلان على نفسى من اللى عملته فيها.
- من المرات القليلة التى يخرج فيها أحمد مجاهد عن صمته بهذا الشكل لماذا؟
فى ناس فى المجلس ما عندهاش إحساس بالمسئولية.. واحد كل همه إنه عاوز يسافر وواحد تانى بيهتم يعمل علاقات، كل دى حاجات توقع أى مجلس وتخلص عليه.
- حاجات زى إيه؟
عندنا مشاكل كتير.. سقوط المنتخبات وإلغاء وديات وخناقات داخل المجلس ومشاكل فى المناطق والفروع وشئون اللاعبين فى كل مكان فيه مشاكل وفى ناس فى المجلس ما عندهاش إحساس وكل واحد بيدور على مصلحته، وبعدين مجلس مش عارف ياخد موقف مع عصام عبد الفتاح عضو المجلس الذى ترك الاتحاد وهرب لفلوس الإمارات.
- كنت عاوز تعمل إيه مع عصام؟
واحد ساب المجلس وهرب علشان يمسك لجنة بفلوس وعاوز يجيب لجنة على مزاجه يدير بيها الحكام من الإمارات ولم يتم إرسال خطاب لعبد الفتاح بالتحذير أو المطالبة بتحديد موقفه يبقى عاوز إيه من المجلس دا.
- يتردد أنك ترغب فى الإشراف على اللجنة بعد رحيل عصام عبد الفتاح؟
أبقى راجل أهبل لو مسكت لجنة الحكام هذه الشائعة يرددها عصام عبد الفتاح، فى الجلسة الأخيرة تركت الاجتماع وغادرت بسبب طلبى صرف مستحقات الحكام اليوم وتمت الموافقة على طلبى وتم حل جزء كبير من مستحقات الحكام.
- ما هى المستحقات التى حصل عليها الحكام فى عهد جمال علام؟
16 مليون جنيه فى المستندات الرسمية ولكنها تصل إلى 20 فى حالة احتساب الإقامة فى مشروع الهدف ومعسكرات للحكام مع المنتخبات، وبعدين إزاى أطلب الإشراف على الحكام هو يعنى مجال التحكيم ما فيهوش رجالة.
- بمعنى؟
التحكيم فيه كفاءات كبيرة مثل جمال الغندور وعصام صيام وآخرين أحق بقيادة اللجنة بعد هروب عبد الفتاح، وتحفظت على قيادة وجيه أحمد للجنة وطلبت قدوم حكم قوى يستطيع لم شمل الحكام، وحزين بسبب شوية بلطجية عاوزين يمشو الاتحاد على مزاجهم.
- يتردد أنك استقلت بسبب حل المجلس ومنح الفرصة لانتخابات؟
أنا الشخص الوحيد اللى قدم استقالته والمجلس مستمر ولم يتم حله.. بس يلعن أبو الانتخابات اللى تعمل فى الواحد كده.. أنا أشطر إدارى فى مصر بس عملت بيها إيه.. بتشتم وبتهاجم مع الفشلة فى المجلس، إحنا عاملين زى الفرقة اللى بتلعب وتطلع كل ماتش 6 /0 إحنا فعلا اتحاد فاشل.
- سبب تراجع الأعضاء عن السفر لسويسرا لحضور انتخابات الفيفا؟
مش تراجع.. هو حسن فريد نائب الرئيس طلب أنه يسافر وكان تم الاتفاق على سفر جمال علام وسيف زاهر ومجدى المتناوى.. وفريد من أقل الأعضاء سفرًا وطلب هذا الأمر على أساس إحراج مجدى المتناوى الذى يعد أكثر الأعضاء سفرًا وتدخل سيف ليعتذر لفريد عن السفر خلال الاجتماع الأخير ولكن لم يحرك المتناوى ساكنا ليعتذر فريد هو الآخر.
- هل ستتراجع عن الاستقالة؟
صعب.. وسأترك المجال لفترة بسبب الضغوط الصعبة التى تعرضت لها فى السنوات الثلاث الماضية.
