صبرى إسماعيل يكتب: شم النسيم

البيض ينادى البصل وبيعزموا السردين
قال الفسيخ إلاّ انا مين اللى زيّى مين؟!
حتى الفراعنة اسألوا من عهدهم هلّيت
فى كل عام باترسم وبافرّح الملايين
*******
والكل شال فرحته لحديقة الحيوان
رقص وشقاوة وغنا وم الفنون ألوان
والفيل يقهقه قوى من فرحته بالناس
حتى الطيور انتشت من فرحة الإنسان
******
وعيال حارتنا بتوكتوك رايحة للبساتين
جامع قلوبهم أمل بالفرح مصريين
السعد مين يشجبه أو يكرهه يا ناس
هو اللى يبنى البلد ويفرّح الياسمين
*******
وكتيبة تانية ببراءة رفرفت ع النيل
والأهرامات صهللت بالزفة والمواويل
شكرا ياشم النسيم يابلسم الأحزان
ياللى بتحيى بجمالك كل حلم جميل