أيوه بنحبها ولو عملت ايه .. يمكن نعارض نظام او حتى نعارض حكام .. لكن نيجى عند اسمها ونقولوا باحترام .. اهو احنا كده بنحبها كده وعايزينها تطول السما .. يمكن ساعات من كتر حبنا فيها بنغضب ونتعصب ولكن أبداً ما نأذيها .. الله عليكى يا بلدى برغم الظروف اللى بنعدى بيها لكن منظر ولادك وهما بيدعولك بالنصر على غانا فجر جوانا مشاعر كبيرة .. يمكن اللى بيتفرج على الماتش دا بيمر بأزمة مادية او صحية لكن جه عندك وبيدعيلك .. هو دا الشعب اللى لا يدمره ارهاب ولا ازمات وهانقف جنبها واحنا رافعين راسنا .. وهانتكلم عنك واحنا بنفتخر بيكى لانك تستحقى .. يمكن بنمر بوعكة صحية .. ازمات اقتصادية .. ارهاب .. لكن دا حال مصر من زمان شقيانة وتعبانة ودا حال شعبها احسن شعوب الدنيا .. بايدينا احنا نعليكى ونخليكى احلى بلد فى الدنيا .. طيب ازاى ؟ بسيطة جداً ابدأ بنفسك احنا ممكن نحارب الارهاب نحاربه من اوله نزرع المحبة فى قلوب اولادنا نعلمهم أن العلاقة بينى وبين ربنا دى علاقة شخصية مش من حق حد يتدخل فيها ولا يكفر حد مهما كان مختلف عنه .. نعلم اولادنا أن انسانيتنا مهمة جداً .. نقف فى وجه الفساد نرفضه مهما كانت الظروف .. ابدأ بنفسك انك تخلى البلد نضيفة .. ابدأ بنفسك انك تلتزم بإشارات المرور .. امور بسيطة جداً لكن هاتفرق جداً .. هانعدى الوقت الصعب وهانبقى احسن بلد .. هانقدر؟ ايوة هانقدر .. افتكر بطولات الجنود البسطاء اللى يمكن ما يعرفوش يقروا ولا يكتبوا لكن اتعلموا يحبوها اوى ويضحوا علشانها .. هاتقولوا دا كلام رومانسى مش واقعى .. هاقولكم جربوا نتعامل معاها برومانسية نطالب بحقوقنا ونعمل واجباتنا ونقف جنب بلدنا .. مافيش حل تانى .. مش هاينفع نسيبها .. ونقول لها زى ما قالها ﭽاهين
على اسم مصر التاريخ يقدر يقول ما شاء
أنا مصر عندى أحب وأجمل الأشياء
باحبها وهى مالكه الأرض شرق وغرب
وباحبها وهى مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زى الداء
واسيبها واطفش فى درب وتبقى هى ف درب
وتلتفت تلقينى جنبها فى الكرب
والنبض ينفض عروقى بألف نغمة وضرب
تم أضافة تعليقك سوف يظهر بعد المراجعة