الطفل أحمد السيسى: ماحدش اتريق على سنانى.. وبحب أغانى العندليب وعدوية

قال الطفل أحمد السيسى لـ«اليوم السابع»، إن أول من علمه الغناء هى أسماء الشورى، مدربة التربية الموسيقية، وهى التى قدمت لى فى البرنامج وأضاف: «اكتشفتنى وعلمتنى، وبدرس فى الأوبرا بقالى كتير، ووالدى والدتى شجعونى على الدراسة فيها، لكن مش بعرف أعزف على أى آلة لكن بحاول أتعلم، وبحب الموسيقى الشرقية، ومثلى الأعلى المطرب تامر حسنى، وبحب أغنى للعندليب الأسمر عبد الحليم حافظ وأغانى أحمد عدوية من الشعبى، أما أغانى المهرجانات مش بحبها عشان فيها ألفاظ سيئة».

وأضاف الطفل: «محدش اتريق على سنانى الواقعة واللى اتريق عليا كان بيهزر معايا»، ولفت إلى أن والداته هى التى اختارت له أغنية «دار يا دار» لوديع الصافى، ثم أصبح تامر يختار له الأغنيات، ويستكمل: «كنت شاكك إنى ماعجبش حد فى لجنة التحكيم وتامر حسنى كان مبسوط جدا إن حد فى سنى بيغنى بالطريقة دى، فرحت جدا ومكنتش متخيل أتخطى أول مرحلة، ومشاركتى معه فى فيلم كانت مجرد دردشة وكلام بس مش رسمى، وكاظم كان بيحبنى جدا ودائما يشجعنى كأنه بيعملنى، ونانسى عجرم كانت بتبوسنى بس، وبكيت على مروان وقلت يوسف بس عشان محدش يقول اشمعنه هو».

وأكد الطفل الموهوب أنه بعد وصوله للمرحلة النهائية والأخيرة لم يشعر بالظلم بعدم فوزه فى المسابقة، قائلاً: «لا مفيش حاجة كسبت أو خسرت بالنسبة لى عادى وصولى للمرحلة النهائية يعتبر أنا أحسن صوت، وأنا بحب أغنية أنا كل ما أقول التوبة وأديتها كويس، وهستمر فى مشوارى لكن سأعطى الدراسة الأهمية الأكبر، وفرحت لما لقيت صورتى نازلة فى اليوم السابع»، ويتحدث الطفل عن الحب قائلا: «أه كان فى واحدة اسمها حبيبة، وبحبها عشان هادية ومش بترغى كتير زى البنات التانية».