بيت صغير أوضتين وصاله
الرضا بالحال راسماله
الحب والفرحة سر جماله
الشقى والتعب هو حاله
يساع من الحبايب الف
ما فى زيه لو تلف
المعاملة فيه باﻻصول
الكرم موجود على طول
الروح الحلوة ساكنه فيه
وفى كل حته الخير مليه
راجل البيت شقيان
ربى وﻻد جدعان
سافر وشاف المر
اكمنه راجل حر
وست البيت بميت راجل
فى الشدة اجدع
من مليون راجل
اصيلة ونبيلة
ربت وكبرت
ضحت سهرت وعلمت
تعبت كتير وﻻ اتكلمت
صانت وحفظت على البيت
من غير شكوى وﻻ حتى صيت
العلم فيه على عماد
راجل عادل من الشداد
شامخ خالد فى حب الوطن
ايمان بالله فى عز المحن
تستحق مليون تكريم
واحلى تكريم
يبقى من عند الكريم
برضاه عنها
ويهدينا ويهديها
الصراط المستقيم
بيت صغير اوضتين وصالة
اجمل من مليون قصر
وكل واحد فى حاله
عدد الردود 0
بواسطة:
محمد أبوهرجة
ابيات من القلب
الله عليك استاذ وائل واصدق جملة دخلت قلبى سافر وشاف المر وما اروعها لملايين المصريين شافوا المر من اجل ان يصرفوا على بيتهم واولادهم فقط وليس من اجل بناء منزل او شراء قطعة ارض كما كان قديما . تحياتى استاذ وائل
عدد الردود 0
بواسطة:
نشات رشدي منصور
الي. العزيز وائل. عبد الودود حسين
اكبر كنز. بيت. تحوط. أركانه. الاربعة السلام. والمحبة. والأمان. .. وحسن. المعاشرة ... يعرف. فيه كل. انسان ما له. وعليه. ويبقي. بعد ذلك كما. قال حدودنا. خروف المحبين بصلة . .. كلامك. في. محله . وجميل
عدد الردود 0
بواسطة:
وائل عبد الودود حسين
استاذ نشأت رشدي استاذ محمد أبو هرجة
أشكركم على تعليقاتكم والحكايه دي فعلاً حقيقية شفتها وعشت معاها بنفسي وفعلا الكنز الحقيقي بيت صغير أو كبير المهم فعلا تحوط أركانه الاربعة السلام والمحبة. والأمان وحسن المعاشرة زي ما قال استاذ نشأت لانه باختصار هي الحياة تمنياتي بالتوفيق والنجاح لكم في حياتكم