"اللى عنده معزة يربطها".. حقيقة "خناقة" أولياء أمور إحدى المدارس.. ولية أمر: "حد ماعندوش ضمير سرب التسجيل".. وتؤكد: "اللى بيتكلم فى التسجيل مش أبو الولد وجروب الواتس آب كله أمهات"

بعد أكثر من 24 ساعة من الجدل الدائر على مواقع التواصل، خرجت علينا إحدى الأمهات المشاركات بجروب أولياء أمور إحدى المدارس، لتكشف عبر حسابها على "فيس بوك" حقيقة التسجيل الصوتى الذى تسبب فى عاصفة على مواقع التواصل الاجتماعى.

وقالت هاجر أم عبد الله الشواف "البوست ده بخصوص الموضوع المنتشر تحت مسمى خناقة أولياء الأمور فى جروب على الواتس آب، ياريت نشر كلامى ده وعلى مسؤليتى لأنه الموضوع زاد عن حده جدا، عشان بس الكلام الكتير ومحدش عارف أى خلفيات، الكلام ده فى فصل ابنى فى الصف الأول وفى مصر مش برة مصر لأنه فى ناس بتقول برة مصر".

وتابعت: تسجيل الأم كان فى جروب الفصل ع الواتس آب اللى كله أمهات، وفى حد مش عنده ضمير فى الجروب معانا أخد التسجيل طلعه برة الجروب وعشان كده انتشر بهذه السرعة، واللى طلع التسجيل مطلعش باقى التسجيلات لأنه التسجيل ده بتاع أم البنت، بعدها أم الولد ردت وبعدين أم البنت ردت عليها، الشاهد إن الموضوع له تكمله موقفش عند هذا التسجيل، كان نفسى الرد التانى بتاع أم البنت يتنشر زى ما ده اتنشر عشان الناس تفهم أساس الموضوع وخلفياته من أول السنة، لكن حد قصد يطلع تسجيل معين لغرض معين".

وأضافت: "الولد ده من أول السنة قرفنا فى المدرسة كلام فى حاجات منتهى قلة الأدب والسفالة وشتيمة كمان، وصدقا أنا أستحى أقول الكلام اللى بيقولوه وعيالنا سمعوه منه، وإحنا كأمهات تواصلنا الأول مع أمه عشان سلوكيات ابنها إن كان سلوك لفظى أو سلوك أخلاقى، لكن للأسف مفيش أى موقف بيتاخد مع الولد وبيزداد فى قلة الأدب، وآخر مازهقنا تم التواصل مع المدرسة وتم استدعاء ولى أمر الولد والمدرسة دلوقتى متابعة الولد، إحنا لا نعيب أبدا على الطفل لأنه مهما كان ده طفل ومحتاج متابعة وتقويم وده اللى كنا بنطلبه، شةء تانى مهم جدا من باب الإنصاف، ورد الرجل غالبا ده مش أبو الولد لأنه جروب الواتس آب كله أمهات مفيش رجالة خالص".

وكشفت: "غالبا حد عمل تسجيل من باب التنكيت والتريقة وتم نشر تسجيل الرجل ده على أنه أبو الولد، وأخيرا أنا بجد كان لازم أرد لأنه الموضوع زاد عن حده، وسبحان الله ربنا قدر لأم البنت تاخد حسنات وهى قاعدة فى بيتهم، ويكفى قولها على كل اللى حصل ده حسبى الله ونعم الوكيل، وربنا يشهد ع كلامى ده".

وكان تسريب صوتى لإحدى أولياء أمور الطالبات تسبب فى إثارة الجدل على مواقع التواصل الاجتماعى وأصبحت حديث السوشيال ميديا.

التسجيل الصوتى المسرب من جروب لأمهات التلاميذ على تطبيق "واتس آب" حسب كلام نشطاء السوشيال، يظهر معركة بين ولية أمر طالبة مع والد أحد الأطفال، بشأن نجلها الذى تجاوز مع الطالبة وقام باحتضانها وتقبيلها داخل الفصل.

وتباين رواد مواقع التواصل فى استقبال الموضوع، ما بين الاستهجان والغضب والسخرية، بسبب ما ظهر فى هذا التسجيل، والدة الطفة تنتقد والدة الطالب الذى "عبد الرحمن" عبر جروب الواتس، بعد أن قام بفعل غير أخلاقى فى الفصل، وقام باحتضان البنت وتقبيلها داخل الفصل.

وقالت والدة التلميذة فى تسجيل نسب إليها، وسرب على مواقع التواصل: "قولت أى حاجة هتضايقنى هتكلم على الجروب زى ما بتكلم فى المدرسة، لازم الأمهات تعرف كل حاجة، أنا لو بنتى عملت حاجة لازم كل الناس تعرف بنتى عملت إيه، عشان نعرف نقوم ونربى ولادنا، النهاردة يا مدام دلال ابن حضرتك عبد الرحمن حضن بنتى وباسها فى الكلاس، أنا مقبلش كده، أنا واحدة منتقبة وجوزى ملتحى، وأدين ده مش سياسة بيت، وأنا بناتى مش بتلعب مع بويز، أنا متخلفة أو مش متخلفة أنا حرة فى دينى، أنا دينى بيمنع الاختلاط، لا عيال ولا كبار، أنا بربى من الصغر على حاجة بتطلع للكبر، ابنك يبوس بنتى ويحضنها بتاع إيه، ليه، فى إيه خير، لو سمحتى كلمى ابنك كده ما ينفعش، وأنا ما أقبلش كده، أخوها الكبير عاوز يروح يضربه بكره، لما ابنك يجيلك متعور، أنا مش ماشية وراهم فى المدرسة وده أخوها، ضربهالى مرتين وملقتش أى أكشن الصراحة، مرة خبطها تحت عينها ومرة عضها فى رأسها، والنهاردة جى حضنها وباسها، ده إن شاء الله، ده اسمه إيه، أنا مقبلش كده، لو سمحتى أرجوكى ملوش دعو ببنتى".

ويظهر فى الجزء الأخر من التسريب، شخص يدعى أنه والد عبد الرحمن، قائلا: "أنا أبو عبد الرحمن وحبيت أرد على حضرتك، اللى عنده معزة يربطها بصراحة، أنا ابنى يبوس اللى هو عاوزه، لو بنتك محترمة ومؤدبة مكنتش خليته يبوسها وكانت اشتكت للأبلة، لكن الطريقة (.....) دى أنا ما بحبهاش، انتى فاكرة إنك هتهزقينا على الجروب وإحنا هانسكتلك، لا يا حبيبتى مش هانسكتلك".