بينما تدور أغنية ما.. ثمة حياة تجرى فى الخلفية.. دى كانت مقدمة كتاب "إذاعة الأغانى" للكاتب عمر طاهر، بيتهيألى الجملتين دول من أقرب وأدق الجمل اللى وصفت ارتباط أحداث حياتنا بالأغاني، الارتباط اللى جايز أوى يكون بيلفت نظر ناس كتير ويأثر فيهم زيى كده و جايز لأ.
من يومين وأنا مروَّحة كنت مشغلة الراديو وفجأة لقيت نفسى باسمع أغنية رجعتنى لأيام إعدادى، أغنية نقدر نقول عليها دلوقتى إن عفا عليها الزمن، ساعتها حسّيت إنى مش بس باسمعها، ده أنا شايفاها، بعدها جَت أغنية مرتبطة بفترة ثانوي، فضلت أغنى وأنا عمالة أضحك وحاسة إنى شايفة حياتى كلها قصاد عيني، شايفاني، شايفة نفسى القديمة، شايفة كنت باحب الأغنية دى ليه و باسمعها معمين، شايفة شكلى ساعتها و حاسة بالإحساس إللى كان بيجيلى و أنا باسمعها وقتها، حاسة بروحى و أنا فى السن ده و كإنى رجعتسنين و سنين لورا.
ناس كتير بتستغربنى لما تلاقينى باتكلم على الأغانى القديمة و فاكرة كل ولحدة فيهم نزلت سنة كام بالظبط، بس الموضوع عمره ما كان ناتجعن شطارتى فى حفظ الأرقام، و لكن كان ناتج عن ارتباط بأحداث عمرى ما حانساها مهما كانت بسيطة أو حتى تافهة، ده تاريخ و عُمْر،عُمرى إللى كل حدث فيه كان دايما مصاحبه نغمة أو صوت معيَّن.
الأغانى بالنسبة لى عمرها ما كانت مجرد كلام لطيف، أو صوت حلو وموسيقى بتعلّق فى وداني، دى شاهد، شاهد كان دايما موجود فيخلفية الأحداث، أو جايز زى ما عمر طاهر بيقول، جايز الأغنية هى إللى بتلعب الدور الأساسي، جايز هى البطل الحقيقى للمشهد و إحناإللى فى الخلفية، ناس كتير ممكن تكون نفس الأغنية شهدت على حدث مختلف فى حياة كل واحد فيهم.
حايفضل بالنسبة لى صوت عمرو دياب هو الصيف وجنونه، فيروز الشتا ببرده و شجنه، محمد منير الحالة الغريبة إللى فهمتها على كَبَر وأغانى تترات سيد حجاب ونس مصاحبنى فى طفولتى كلها، و رغم إن كل دى ثوابت غالبا عمرها ما حاتتغير، مهما كبرنا و مهما السنينعدِّت علينا و غيرت فينا و جوانا حاتفضل نفس الرعشة تجيلنا فى كل مرة نسمع فيها الأغانى دى سواء عن قصد أو بالصدفة، ساعتهاماتبقاش عارف دى رعشة الفرحة ولا الحنين ولا الزعل على أيام راحت و ناس كانوا جزء أساسى من حياتنا فى وقت من الأوقات و للأسفدورهم خلص و مافضلش منهم غير ذكرى، ساعتها بس حاتعرف إن مهما إتغيَرت و الدنيا كلها إتغيرت، حاتفضل الأغنية ولحنها وذكراهاهى الحاجة الوحيدة اللى صعب أوى تتغير، صعب تتمحى أو تبطَّل تعنى لنا شئ، حاتفضل الغنوة ملازمانا و كل ما نسمعها، نشوف حياتناو هى بتجرى فى الخلفية.
تم أضافة تعليقك سوف يظهر بعد المراجعة