وزير النقل يستقل أول قطارعادى مسبق الحجز من محطة مصر.. راكب للوزير: "القطار بيتشرب فيه مخدرات وحماماته خربانة وعاوزنا نحافظ عليه؟".. وسعد الجيوشى يعلن إنشاء محكمة لمخالفات السكة الحديد والمترو

أعطى الدكتور سعد الجيوشى، وزير النقل من محطة مصر برمسيس، شارة انطلاق حملة إعادة الانطباط بالسكة الحديد والمترو لمواجهة التهرب من التذاكر والباعة الجائلين بالقطارات والمحطات، مستقلاً من محطة مصر أول قطار عادى مسبق الحجز مرقم مقاعده والمتوجه إلى طنطا لتفقد ورش السكة الحديد، وتجول الوزير داخل القطار مستمعًا إلى شكاوى الركاب.

راكب لـ"وزير النقل": "القطار بيتشرب فيه مخدرات"

واشتكى الركاب إلى وزير النقل أثناء تفقده القطار العادى رقم 13 المتوجه إلى طنطا بسبب سوء مستوى النظافة والخدمة بالقطار، وتحطيم زجاج القطارات العادية، وقال راكب للوزير: "القطار بيتشرب فيه مخدرات وحماماته خربانة والزجاج مكسر وعاوزنا نحافظ عليه.. إحنا مش بنلاقى كراسى نقعد عليها وعاوزنا ندفع 7 جنيه؟".

ورد الوزير على الراكب: "أنا لسه جاى الوزارة جديد.. ولسه هتشوفوا الجديد.. وحافظوا على القطار اللى طورناه.. ده أول قطار وإن شاء الله كل القطارات هتبقى زى ده بس حافظوا عليها".

وقالت راكبة أخرى للوزير: "أنا جاية جرى عشان ألحق القطار ومعرفتشى اقطع تذكرة من شباك التذاكر.. عشان كده غرمونى تذكرة بـ13 جنيه.. أنا أول مرة أشوف قطار نضيف بالشكل ده.. القطارات اللى بركبها كل يوم حالتها سيئة وزجاجها مكسر"، ليرد الوزير: "انتى أكيد أول مرة تشوفى وزير فى القطار..أنا هحط نظام يريح الناس.. والقطار ده سيكون نموذج هيبطق على باقى القطارات".

ورصدت "اليوم السابع"، تسطح الركاب للأرفف المخصصة للحقائب بالقطار رقم 13 المتوجه إلى طنطا خلال تفقد وزير النقل الدكتور سعد الجيوشى له، من شدة الزحام وعدم وجود مكان خالٍ يقفون عليه بالقطار، ووقعت مشادات بين أفراد الأمن وبعض الركاب أثناء محاولتهم إخلاء ممر وسط الزحام بالقطار لعبور الوزير، بسبب إصرارهم على نقل شكواهم للوزير من سوء الخدمة.

وزير النقل: محكمة مختصة بمخالفات السكك الحديدية والمترو

وأعلن وزير النقل خلال جولته موافقة وزير العدل على إنشاء محكمة خاصة بمخالفات النقل سواء السكة الحديد أو المترو من أجل سرعة البت فى قضاياها، مشيرًا إلى المحكمة ستختص بمخالفات السكة الحديد والمترو والتهرب من التذاكر والباعة الجائلين وجرائم التحرش التى تحدث بالمحطات والقطارات.

موضوعات متعلقة:

بالفيديو.. راكب لوزير النقل: عاوزنا نحافظ على قطار خربان وبيتشرب فيه مخدرات