مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
.............
ياااا ليلة القدر.. وفّيت ندر كان مندور
يا صايم افطر وقول يا رب يطلع نور
الليله صافيه.. وقلوب المغرمين مفطور
والبدر أصبح فى وشّ حبيبتى بدر بدور
.............
ياااا ليلة القدر.. بادعى وصوتى طالع فوق
فطّرت ناسى ومشيت رافع رايات الشوق
يا رب عشقك مطهّر روحى وجروحى
يا وقت بوحى النهارده الفرحه طايره نشوق
.............
افطر يا خلّى.. سلّم وصلّى
يا رب حَلّى.. مطرح محلّى
يا رب داوى... كلّ اللى ناوى
ينضف ويبعد عن البلاوى
هذا أوانى.. شاعر مداوى
لفّيت حوارى.. ساعة العصارى
ومشيت أغنّى فوق الكبارى:
.............
لمّا تحسّ إنك متدفِّى برُوح الله
غنّى وما تخافش
دوس فى الأرض كإنك نور
واسعى كإنك طيف مسحور
ربّك بيخلّى المكسور
مارد، بس يدوس ما يقفش
.............
لمّا تحسّ إنك متدِّفى برُوح الله
احلم ما تخافش
ربّك موجود فى الأرواح
رغم إن الروح ما بتتشافش
.............
يااا ليلة القدر... حلم الضىّ جوّانا
جانا السنادى الصيام... والفرحه جيّانا
احمى يا رب الحبايب واحفظ الغايبين
واقفين بندعى وملايكة ربّنا معانا
.............
مفطّراتى.. ماشى بآلاتى
ويّايا طبله ومغنّواتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
تم أضافة تعليقك سوف يظهر بعد المراجعة